Литванија се избори за позицијата која води во квалификациите за Олимписките игри во Лондон следната година откако вчера со 77:80 славеше над Словенија, во првата битка од пласманот од 5-8 место на Евробаскетот.
Двете репрезентации имаа многу кусо време за рехабилитација и консолидирање на редовите по двата четвртфинални натпревари во кои Словенија беше елиминирана од Шпанија, додека Литванија доживеа непријатно изненадување во последните секунди во дуелот со Македонија, па така на теренот беше видлив заморот и кај двата тима, но успеаја да презентираат уште еден драматичен дуел.
За фановите и репрезентацијата на Словенија вчерашниот натпревар претставуваше своевидно "дежа ву" бидејќи ја "репризираа" играта од еден ден порано, односно стартуваа со убедливи 14:6, за до крајот на четвртината да дозволат комплетно враќање на домаќинот и минимални 20:19.
И како и во мечот со "фуријата", така и вчера Словенија се загуби во продолжението, серија од 0-7 за Литванија и пресврт, кој ги однесе во водство од 34:28.
Публиката одигра значајна улога со поддршката на својата репрезентација, која се до крајот на третиот период покажуваше комплетна решеност за победа.
Ако во почетокот на натпреварот Словенците беа тие кои се соочуваа со "дежа ву" ситуација, во финишот тоа премина на страната на литванскиот состав.
Многуте грешки и несигурната игра под кошот донесоа изедначување 65:65 во раната фаза од последните десет минути, а неизвесноста траеше се до последната секунда, кога Г. Драгич не успеа да го реализира шутот за три поени, што ќе донесеше изедначување и продолжување на дуелот.
Сега Литванија и Словенија имаат ден одмор во кој треба да ги добијат конкурентите со кои ќе се борат за конечниот пласман на првенството.