Македонската кошаркарска репрезентација е поразена од Шпанија и в недела ќе се бори за третото место и бронзениот медал на ЕП во кошарка што се одржува во Литванија.
Конечниот резултат на првиот полуфинален дуел од ЕП одигран попладнево во Каунас изнесува 92:80 за шпанската репрезентација. По првото полувреме Македонија водеше со 45:44.
Бранителот на трофејот Шпанија не им дозволи на македонските кошаркари да ја одиграат својата препознатлива одбрана. По 26:18 за Шпанија во првата четвртина, Македонија се врати резултатски во вториот период. До средината на третата четвртина постоеше резултатска рамнотежа, а од 26 минута Шпанците резултатски се одлепија и веќе по 30 минути игра водеа со 71:62. Ова предност рутински ја сочува до крајот и заслужено се пласира во финалето.
И покрај поразот избраниците на селекторот Марин Докузовски за прикажаната борбеност со аплаузи беа испратени од преку 500 македонски навивачи кои беа присутни во „Жалгирис“ арената во Каунас и од другите присутни љубители на кошарката. „Црвено-жолтите“ достојно ја презентираа својата држава иако играа без повредениот Гечевски со што беа ослабени во скок играта.
Најефикасен во македонскиот состав беше Лестер Бо Мекејлеб со 25 поени. Двоцифрен број поени постигнаа и Перо Антиќ -17, Владо Илиевски - 15 и Предраг Самарџиски -12.
За Шпанија, а воедно и на натпреварот најдобар играч беше Хуан Карлос Наваро со 35 постигнати поени од кои пет тројки. По Гасол имаше ефект од 22 поени и 17 скокови.
Второто полуфинале на програмата е вечерва од 20 часот, а во него ќе играат Франција и Русија. Победникот од овој дуел в недела од 20 часот ќе игра во финалето со Шпанија, а поразената репрезентација ќе биде последната пречка на патот на македонските кошаркари кон освојување на бронзениот медал. Почетокот на тој дуел е во 16 часот и 30 минути.