Претседателот на Реал Мадрид, Флорентино Перез ја објави веста која сите ја очекуваа, а тоа е дека тренерот Карло Анчелоти повеќе нема да го води клубот. Иако играчите застанаа зад тренерот, сепак, Перез немаше многу трпение за стратегот, кој уште претходно изјави дека не планира да работи во следната сезона бидејќи мора на операција.
Ова е најава дека во следните неколку дена ќе дојде до назначување на нов стратег. Перез е за тренер кој зборува шпански односно сака домашен стручњак на клупата, а според тоа фаворит е Рафаел Бенитез. Од друга страна, пак, фановите на клубот сметаат дека титулите ќе се вратат со Јирген Клоп кој е без ангажман во моментов.
Според тоа се очекува во следните денови да биде познато кој од овие двајца ќе добие шанса.
Сепак, има и трет кандидат, а тоа е поранешниот играч на клубот Мичел, кој одлично работеше во тимот на Олимпијакос.
МОРА НА ОПЕРАЦИЈА
Перез не ги објасни причините поради кои дојде до разделба, но Анчелоти самиот уште пред неколку дена најави дека ќе си замине и ќе мора да среди некои работи за да санира здравствени проблеми.
„Кажав уште на прес-конференцијата, а ќе повторам уште еднаш. Земам одмор од една година. Имам многу сериозна причина за тоа. Морам да заминам на операција на грбот и извесно време ќе бидам надвор од терените. Не смеам да си дозволам повеќе да чекам бидејќи повредата влијае на моите раце, а може да почне да влијае и на моите нозе. Операцијата е веќе договорена и едноставно морам да ја извршам“, вели Анчелоти.
ЛОША ВЕСТ ЗА МИЛАН
Од друга страна ваквите вести кои пристигнуваат од Анчелоти се многу лоши за тимот на Милан. „Росонерите“ планираат да го вратат својот поранешен тренер со кој имаа многу успеси.
„Галијани доаѓа во Мадрид? За мене ќе биде вистинско задоволство да вечерам со него, но нема како да ја сменам својата програма. Мојата операција е договорена и ќе се случи во Канада во Ванкувер. Со мојата сопруга веќе изнајмивме куќа. Ми треба одмор. Последните две години во кои работев во Реал беа навистина тешки. Верувајте ми. Никој не може да си претстави колку физичка и психолошка енергија беше потребна за да се работи во овој клуб“, коментира Анчелоти.
ЕМЕРИ ВО ПРВ ПЛАН
По овие изјави од Анчелоти во Милан очигледно ќе мора да се насочат кон стратегот на Севиља. Во таборот на „росонерите“ планираат да го донесат Унаи Емери, кој во две години по ред игра во финалето на Лигата на Европа со својот тим.
Сепак, оваа вест останува со резерва бидејќи во Милан и понатаму се надеваат дека ќе успеат да го убедат Карло Анчелоти да го преземе водењето на тимот од Милано.