Манчестер Јунајтед го ослободи Радамел Фалкао и е решен да донесе нов напаѓач во своите редови, и тоа не било кого туку фудбалска ѕвезда. Управата на клубот од Манчестер сака да го донесе напаѓачот Хари Кејн, кој во сезоната што помина имаше импресивни настапи.
Челните луѓе се подготвени да достават „пакетче“ вредно 50 милиони евра во замена за Хари Кејн.
Имено, менаџерот Ван Гал ќе му понуди на Тотенхем да одбира меѓу три играчи Хавиер Хернандез, Нани и Аднан Јанузај и плус пари за 21-годишниот фудбалер кој сезонава во сите натпреварувања постигна вкупно 30 гола.
Тотенхем имаше големи проблеми во сезоната што помина. Играчите не беа на нивото, а резултатите беа разочарувачки. Кејн беше единствената светла точка, додека другите напаѓачи Роберто Солдадо и Емануел Адебајор веќе втора сезона се вистинско разочарување и летово ќе го напуштат клубот. Прашање е дали Тотенхем ќе се согласи на оваа понуда на Јунајтед бидејќи ако остане без Кејн ќе мора комплетно да го реконструира нападот.
Кејн во февруари оваа година го продолжи договорот со Тотенхем на пет и пол години, поточно до јуни 2020 година. Во меѓувреме Тотенхем се вклучи во трката по белгискиот напаѓач Кристијан Бентеке од Астон Вила.
ЗА БЕНЗЕМА 55 МИЛИОНИ ЕВРА
Манчестер Јунајтед сериозно е заинтересиран за напаѓачот на Реал Мадрид Карим Бензема. Според пишувањата на „Манчестер Ивнинг Њуз“, претседателот на „Црвените ѓаволи“ Ед Вудвард минатата среда во Лондон имал состанок со агентите на Бензема и било разговарано за негов трансфер на „Олд Трафорд“. Французинот има договор до 2019 година, меѓутоа со доаѓањето на Рафа Бенитез на клупата на „Кралевите“ работите можат да се променат.
Според пишувањата на мадридските весници, Бензема би го напуштил „Сантијаго Бернабе“ во случај на понуда од 55 милиони евра.