Манчестер Јунајтед го засилува средниот ред со францускиот репрезентативец Морган Шнајдерлин, кој во текот на оваа недела ќе ги прецизира деталите и ќе го облече дресот на „Црвените ѓаволи“, пренесуваат англиските медиуми. Шнајдерлин ја прифатил понудата од Манчестер и ќе го напушти Саутемптон по седум години верност. Тој ќе потпише четиригодишен договор, а клубот од „Олд Трафорд“ ќе плати 25 милиони фунти.
Овој играч беше интересен и за Арсенал, кој не беше во можност да ги исполни неговите високи побарувања.
Шнајдерлин е дефанзивен играч за врска, а последните две сезони му беа најуспешни во Премиер-лигата во кариерата бидејќи имаше најмногу освоени топки и точни додавања од кој било играч во најсилната англиска лига. Тој има 230 настапи за Саутемптон во Премиер лигата и 14 погодоци. Претходно настапуваше за Стразбур. За Франција запиша девет настапи.
Шнајдерлин станува второто летно засилување за Манчестер Јунајтед по холандскиот крилен напаѓач Мемфис Депај. Но трофејниот англиски клуб нема да застане тука. Во план се уште неколку засилувања, а меѓу нив и Бастијан Швајнштајгер од Баерн Минхен.