Кој би рекол дека ќе се случеше ова. За најголемиот спортски настан кој што треба да се одржи во Македонија досега, лобирал Грк! Имено Гркот Теодор Теодоридис, кој е заменик на генералниот секретар на УЕФА е еден од најзаслужните што Скопје ја доби организацијата на овој голем спортски настан, најголем во историјата на Македонија.
Теодоридис веќе бил во Скопје, во инспекција на арената „Филип Втори“ и неговите препораки биле позитивни, а имал средба и со премиерот Никола Груевски.
- Потврдивме дека ќе ги искористиме сите свои адути за да покажеме дека Македонија и нашиот главен град во секој поглед ќе бидат подготвени за големиот настан. Се надеваме на поддршка на УЕФА, градот Скопје и институциите кои би биле вклучени во остварување на големата цел за организација на европскиот Супер куп“, изјави тогаш претседателот на ФФМ, Илчо Ѓорѓиоски, за Спорт медија.
Скопје во август 2017 година ќе биде домаќин на двете најдобри екипи на европска почва што претставува огромно признание за македонскиот фудбал и Фудбалската федерација на Македонија кои добиваат историска организација на врвен европски фудбалски настан. Значи во Скопје ќе играат победниците на Лигата на Шампионите и Лигата на Европа.