Уругвајскиот напаѓач Единсон Кавани е казнет со два натпревари, а селекторот Оскар Табарез доби суспензија од три натпревари поради случувањата на средбата со Чиле во четвртфиналето од Копа Америка.
Фудбалската федерација на Јужна Америка го казни Кавани за удирањето на Гонзало Хара, откако беше испровоциран со вулгарен гест.
Во објаснувањето се наведува дека Кавани еден натпревар е казнет автоматски поради црвениот картон, а вториот натпревар суспензија го доби за навредите упатени кон судиите кои не забележаа дека Кавани е испровоциран од Чилеанецот.
Напаѓачот на Париз Сен Жермен ќе го пропушти натпреварот на националниот тим против Боливија на 8 октомври, а четири дена подоцна нема да смее да игра ниту на дуелот против Колумбија во квалификациите за Светското првенство во Русија.
Селекторот на Уругвај Оскар Табарез исто така, е суспендиран од три натпревари, поради навреди на судиите на истиот натпревар кој го доби Чиле со 1:0.