Фудбалерите на Челзи му даваат целосна поддршка на својот менаџер Жозе Мурињо, кој е на излезна врата од клубот по седмиот премиерлигашки пораз во сезоната. „Сините“ загубија на гостувањето кај Стоук, тимот од кого испаднаа пред неколку недели во Лига купот и сега имаат само 11 бодови по 12 кола во Премиер-лигата.
Мурињо поради суспензија го следеше мечот од трибините, а неговите момци беа немоќни против Стоук. На крајот резултатот беше 1:0 за Стоук благодарение на актобатскиот погодок на Марко Арнаутовиќ.
„Сакавме поради Жозе да направиме добар резултат, но среќата ни го сврте грбот. Ја погодивме рамката од голот, не погодивме од одлични ситуации и си ги направивме работите претешки“, вели голманот Асмир Беговиќ, кој прашан дали е загрижен што Мурињо може да добие отказ одговори:
„Тоа сега не зависи од нас. Ние сме зад својот менаџер во овие тешки моменти. Мислиме дека тој е вистинскиот човек за клубот и некој кој овде најмногу работи. Секогаш се чувствува неговото присуство на теренот“.
Мурињо првпат како менаџер има седум прволигашки порази во сезоната, а Челзи првпат по сезоната 1978/79 губи толкав број натпревари по 12 одиграни кола (таа сезона испаднале од лигата). Челзи не ја сочувал мрежата на последните осум гостувања во Премиер-лигата.