Македонската фудбалска репрезентација претрпе минимален пораз од Словенија со 1:0.
Во пријателскиот меч одигран попладнево во Копер, избраниците на селекторот Игор Ангеловски одиграа добро прво полувреме во кое создадоа неколку изгледни шанси, но ударите на Пандев и Ибраими не ја погодија целта па на одмор се замина без постигнат гол.
Во вториот дел, домаќините беа оние кои го диктираа темпото. Таквата игра на Словенците им донесе резултат, па по една грешка на нашата одбрана Роман Бежјак во 58-минута го постигна единствениот гол на натпреварот.
Иако во продолжението црвено-жолтите се одбидуваа да стигнат до израмнување, сепак резултатот остана непроменат 1:0 за Словенија. Ова е прв пораз на македонската репрезентација во четирите пријателски меча со Словенија, откако на првите три дуели на победа се радуваа нашите фудбалери.
Нашата најдобра репрезентација ќе има можност да го поправи впечатокот веќе на 29 март кога на арената „Филип Втори’’ во Скопје, ќе одигра пријателски меч со селекцијата на Бугарија. Овој натпревар ќе се игра во терминот од 19 часот.