Откако една сезона го носеше дресот на Калјари, поточно во сезоната 2013/2014 кога како позајмен беше во Серија „А“, на добар пат е таму да биде и во сезоната 2016/2017. Агим Ибраими е многу блиску до „кам-бек“ во Италија, дознава „Македонски спорт“ од сигурни извори. Поточно е јасно дека Агим Ибраими ќе има нов клуб по завршувањето на сезоната, а речиси 100% се враќа на „Чизмата“. Ибраими има одлична биографија, има играно во Италија, репрезентативец е и тоа ќе му донесе нов трансфер откако е јасно дека ќе си замине од Марибор по караницата со Златко Заховиќ и преписката којашто беше актуелна во изминатиот период.
Наскоро ќе се знае и новиот клуб на Ибраими, а тој како слободен ќе се пресели во Италија откако ќе добие раскин на договорот по караницата и тужбата со Марибор.
ПАНДЕВ КАКО ПОМОШ
Агим Ибраими ќе има помош во обидот да направи трансфер во Италија. И тоа од најдобриот македонски фудбалер, од големиот Горан Пандев. Менаџерите на Пандев ќе му помогнат на Ибраими да се врати во Италија, вест која ја потврди и фудбалерот на Џенова.
„Да, точно е. Моите менаџери ќе му помогнат на Ибраими. Јас разговарав со нив и им реков поради тоа што знам дека Агим е квалитетен фудбалер и одличен како личност. Ќе се обидам колку што е во моја моќ да му се помогне затоа што тоа што му се случи не го заслужува. Верувам дека ќе најде добар клуб каде што ќе ја продолжи кариерата“, изјави Пандев.