Младиот германски голман Лорис Кариус е нов член на англискиот премиерлигаш Ливерпул. Се работи за 22-годишен чувар на мрежата кој досега ги бранеше боите на Мајнц и кого го сметаат за еден од најперспективните играчи на својата позиција во Германија. Тој доаѓа на инсистирање на Јирген Клоп, кој за него има пофални зборови. Кариус потпиша петгодишен договор, а сумата за трансфер, која клубовите не ја објавија, се претпоставува дека изнесува околу 4,7 милиони евра.
Кариус дозволи 42 гола во Бундес лигата оваа сезона, а на девет меча не прими гол. Тој потекнува од школата на Штутгарт, а на 16 години бил во Манчестер Сити, но во јануари 2012 година се врати во Германија и го облече дресот на Мајнц.
„Му благодарам на Мајнц што им овозможи на млади години да бидам дел од Бундес лигата. Сега се подготвувам за новиот предизвик наречен Премиер лига. Тоа е голем чекор напред во мојата кариера“, изјави Кариус.
Германскиот голман стана четвртото засилување на „Црвените“ за идната сезона. Пред него Клоп ги договори Жоел Матип од Шалке како слободен играч и српскиот халф Марко Грујиќ од Црвена Звезда.