Северна Ирска е едно од најпријатните изненадувања, откако се избори за место во осмина-финалето. Доволно им беше само една победа, и тоа во дуелот со Украина, додека во останатите два меча минимално со по 1:0 загубија од фаворизираните Германија и Полска. Еден од главните херои во составот е голманот Мајкл Мек-Говерн. Тој блескаше на средбите против Германија и Полска откако успеа да го спаси својот тим од многу поубедливи порази. Токму тоа што речиси се успеа да одбрани, на Северна Ирска и даде подобра гол разлика од Турција и Албанија, кои испаднаа како третопласирани. Против Германија одбрани дури девет шута од кои три беа зицери.
„Уште поголема инспирација имам за да бранам добро бидејќи сум без клуб. Барам екипа каде ќе играм следната сезона“, рече Мек-Говерн, кој минатата сезона бранеше за Хамилтон во Шкотска. Ако продолжи со добрите игри, сигурно Мек-Говерн може да потпише за некој многу подобар тим и нема да остане без работа во следната сезона.