Најдобриот светски фудбалер Лионел Меси одлучи да се повлече од аргентинската фудбалска репрезентација за која настапуваше повеќе од една деценија.
Причина за ставањето крај на репрезентативната кариера на фудбалерот на Барселона е огромното разочарување по поразот од Чиле во финалето од Копа Америка одиграно ноќеска во Ист Рутерфорд, САД.
Аргентина загуби на пенали, а Меси не го реализира ударот од 11 метри во првата серија.
29-годишниот Меси силно посакуваше трофеј со Аргентина, но и по четвртото финале, три на Копа Америка и едно на Мундијалите, не успеа да се искачи на тронот.
- Мојата репрезентативна кариера е готова. Се трудев, но повторно останавме без трофејот, а јас утнав важен пенал, истакна Меси.
Тој за Аргентина има одиграно 113 натпревари и постигнато 55 погодоци.