Андре Гомеш официјално е новиот фудбалер на Барселона. Тој потпиша петгодишен договор со шпанскиот првак кој ќе ѝ плати на Валенсија 35 милиони евра како отшета плус 20 милиони евра во вид на бонуси.
„Задоволен сум што дојдов во голем клуб и што ќе играм со врвни фудбалери. Целта ми е да освојам што е можно повеќе трофеи со Барселона. Среќен сум и мислам дека го донесов најдоброто решение“, изјави Гомеш кој беше цел и на други европски клубови.
Гомеш е еден од ретките фудбалери кои ќе ја дели соблекувалната со двете најголеми ѕвезди на денешницата Кристијано Роналдо и Лео Меси. Со Роналдо се соиграчи во португалската репрезентација, а со Меси ќе играат заедно во Барселона.
БОНУС ВО СЛУЧАЈ НА „ЗЛАТНА ТОПКА“?
Како дел од договорот меѓу Барселона и Валенсија за трансферот на Гомеш, стои дека каталонскиот гигант ќе треба да ѝ исплати на Валенсија дополнителни 15 милиони евра во случај играчот од средниот ред да освои две „Златни топки“. Тоа е чудна точка од договорот но не и невозможна. Никој неможе да претпостави како ќе се движи кариерата на младиот Португалец.
РАМКА
Маскерано продолжи до 2019
Ниту во Јувентус, ниту во друг европски клуб. Хавиер Маскерано останува верен на Барселона, а тоа го покажа со потпишување на нов договор до 30 јуни 2019 година. Претходната соработка му истекуваше во 2018 година но сега е обновена на уште една година. Маскерано дојде во Барса од Ливерпул во 2010 година, а одигра 282 натпревари во сите конкуренции и освои 16 титули. Минатата сезона почна како играч за врска, а заврши како централен дефанзивец и се покажа како одличен.