Со приклучувањето на капитенот Горан Пандев и голманот Столе Димитриевски македонската фудбалска репрезентација во комплетен состав денеска ги продолжува подготовките за квалификацискиот натпревар против Албанија.
Најдобриот македонски фудбалер Пандев вели дека заедништвото, оптимизмот и одлучноста може да не водат кон подобри резултати во претстојниот квалификацискиот циклус за СП 2018.
- Со нетрпение го очекуваме почетокот на новиот квалификациски циклус и натпреварот со Албанија. Наша цел ќе биде да го подобриме рејтингот на македонскиот фудбал и мислам дека сме подготвени да го направиме тоа во пресметките кои ни следуваат. Оптимизмот ни е потребен, заедништвото, одлучноста и квалитетот треба да не водат до успех. Групата е тешка, секој натпревар е посебен предизвик, но верувам во играчите и стручниот штаб. Мораме да се обидеме да направиме нешто значајно, вели Пандев.
Сите овие играчи во составот живеат за Македонија и тоа ќе го покажеме на терен. Ќе биде тежок натпревар, се е можно...можеби ќе победиме, можеби ќе загубиме, но ќе се бориме на вистински начин, додаде македонскиот капитен.
Македонија на 5 септември во Скадар ќе и гостува на Албанија во првото коло од Мундијалските квалификации.