По повеќе од тридецениско „владеење“, некогашниот италијански гигант Милан доби нов сопственик. Силвио Берлускони реши да го продаде тимот на кинески милионери, кои треба да го вратат клубот на старите славни патеки. „Росонерите“ во последните неколку години се далеку од врвот не само во Европа, туку и во Италија.
Новите газди решија да направат структурални промени, па донесоа нови луѓе на некои од клучните позиции во клубот. Проблемот настана во тоа што новите луѓе во клубот, претходно работеле во големиот градски ривал Интер. На позицијата спортски директор е назначен Масимо Мирабели, додека одговорен во администрацијата е Марко Фасоне. Овие двајца претходно работеле во Интер, што наиде на негативни реакции кај поранешните ѕвезди на Милан.
Со негодувања се јавија вечниот капитен Паоло Малдини, како и легендите Алесандро Костакурта и Деметрио Албертини. Сите беа зачудени од овие потези на новите газди, бидејќи несвојствено е луѓе кои работеле во градски ривал, сега да бидат главни во Милан. На страна на овие тројца застана и некогашниот освојувач на „Златната топка“, Андриј Шевченко.
„Слушнав дека луѓето кои работеле во Интер, сега се дојдени во Милан и ги имаат главните функции. Што е следното? Можеби сега некој ќе се обиде да го смени и името на клубот. Не знам што друго да кажам. позицијата спортски директор требаше да му припадне на некој како што се Паоло, Били или Демитрио, кои оставиле белег во клубот“, вели популарниот Шева, кој има преку 250 настапи за Милан и над 130 погодоци.