Челзи не успеа да ја продолжи серијата победи против Арсенал во Премиер лигата. Тимот предводен од Антонио Конте доживеа нокдаун на Емирати, дома си замина со три парчиња во мрежата. Конте го изгуби првото лондонско дерби и нанижа три натпревари по ред без победа во шампионатот, а неговиот колега Арсен Венгер на фантастичен начин ја одбележа 20-годишнината на чело на Арсенал.
„Топчиите“ поведоа по грешката на Гери Кејхил, која ја искористи Алексис Санчез и го совлада голманот на Челзи. Само три минути подоцна Ивоби на десната страна го пронајде Белерин, а овој му асистираше на Волкот за 2:0. Во финишот на првиот дел, по една контра Санчез го пронајде Озил во нападот, а Германецот го совлада немоќниот Куртоа. А и во второто полувреме Челзи не беше ништо подобар од противникот, но барем не примија уште некој гол за поубедлив пораз. Конте по натпреварот ја долови реалната слика во Челзи по трите натпревари без победа во Премиер лигата.
„Од првата минута немавме став, а игравме против добар тим, организиран и во тактички и во физичка смисла. По овој пораз, знаеме дека мораме многу да работиме. Ние сме сега страшен тим, но само на хартија. А секој проблем на тимот влијае и врз перформансите на секој играч посебно. Кога ништо не е в ред, на играчот му е многу тешко да одигра добар натпревар“, изјави Конте, чиј тим сега заостанува осум бодови зад првопласираниот Манчестер сити.
„Манчестер сити многу добро ја почна сезоната. Играат фуриозно и заслужено се на чело на табелата. Меѓутоа, важно е да си го гледаме нашиот двор, а не другите“, додаде Италијанецот.