Шокантни се прогнозите на оние портали и сајтови кои се занимаваат со прогнозирање на ФИФА листата.
Имено, ако на претстојните два меча со Израел (06.10) и Италија (09.10), нашата најдобра репрезентација не освои ниту еден бод, значи ако загуби на двата, тогаш Македонија на следната листа на ФИФА, на октомвриската, ќе се најде на неверојатното 151. место.
Значи ќе се пробие и таа бариера од 150. Да кажеме дека следната листа ФИФА ќе ја објави на 20 октомври, кога ќе бидат одиграни сите квалификациски средби за СП во Русија 2018 година на сите континенти. Инаку, Македонија сега го има најслабиот ранкинг во историјата, сега сме на 146. место, никогаш не сме биле послаби. Веруваме дека селекторот Игор Ангеловски и неговите момци на дуелите со Израел и Италија, и двете во Скопје ќе успеат да освојат најмалку еден бод.
ВО ДРУШТВО НА ЕГЗОТИЧНИТЕ ОСТРОВИ
Ако Македонија загуби со Израел и Италија, и ако, сепак, се најдеме на 151. место во светот, тогаш навистина ќе биде во друштво на егзотичните острови. како на пример Маурициус, Барбадос, Малдиви, Аруба, Белизе, Санта Луција, Тахити, Фиџи и др.