Многу киксови во одбраната, слаба концентрација и безидејна игра беа причините за нов пораз на Интер во Лигата на Европа, втор по оној дебакл во првото коло против Хапоел Бер Шева на Џузепе Меаца. Синоќа во Прага „нероаѕурите“ беа жртва на Спарта во меч во кој ништо не им одеше, па да победеа ќе беше незаслужено.
А Спарта стартуваше фантастично под раководство на новиот тренер Давид Холубек. И без Росицки, Ваха, Захустел и Шурал во тимот „Челичната Спарта“ успеа да го тресне фаворитот, моќниот Интер пред своите навивачи.
Голеадата започна по грешката на Ранокија и Мело. Нивното двоумење кој да тргне да ја избие топката од казнениот простор го искористи Вацлав Кадлец кој со прецизен удар го совлада Хандановиќ. Тоа беше седмипат во осум официјални мечеви оваа сезона на кои Интер прв прима гол.
А и вториот погодок падна по невнимание на одбранбените играчи во сино-црно. Домашните изведоа слободен удар и додека дефанзивците гледаа дали судијата ќе покаже офсајд, Кадлец вторпат го совлада словенечкиот голман.
Родриго Паласио постигна гол за Интер кој не значеше и будење на италијанскиот тим. Напротив, Ранокија направи прекршок за исклучување (втор жолт картон), а Чесите изведоа слободен удар по кој Марио Холек со глава ја затресе мрежата за конечни 3:1 и прва победа за Спарта во новата сезона на Лигата на Европа. Освен тоа Спарта е непоразена на шест натпревари на домашен терен против италијански екипи (три победи и три ремија). Интер е во низа од четири порази во Европа.