Пратеници од британскиот Парламент побараа од Владата да покрена јавна истрага за корупцијата во англискиот фудбал, откако беше откриен скандалот со слекторот Сем Алардајс, кој морашше да поднесе оставка по само 67 дена на функцијата.
Пратениците бараат да се повикаат на сослушување во Комисијата за култура, медиуми и спорт, членовите од раководството на англиската Фудбалска асоцијација (ФА), за да се утврди нивниот дел од вината, а посебно за да се дознае дали тие знаеле за она што се случува во домашниот фудбал.
Аферата беше обелоденета кога новинари на „Дејли Телеграф“ преправени во бизнисмени од Далечниот Исток со скриена камера го снимиле нивниот разговор со Алардајс, во кој тој вели дека „не е никаков проблем да се изиграат прописите на ФА околу трансферот на играчи“ и прифаќа за надомест од 400 илјади фунти да претставува измислена азиска компанија која се занимава со ваков бизнис.
Селекторот, кој ја водеше репрезентацијата само на еден натпревар, со својата постапка откри разгранета корупција при трансферот играчи во која тренерите и менаџерите на клубовите земаат поткуп и провизија.
Весникот тврди дека покрај Алардајс, кој на тајно снимениот материјал се фали дека знае за фудбалски агенти кои редовно ги изигруваат прописите, има осум други тренери од Премиер лигата и од Чемпионшиот на Англија. кои земаат процент од трансферите.
„Дејли Телеграф“ сега посочува дека еден од нив е заменик тренерот на „Саутхемптон“. Ерик Блек.
Сем Алардајс се пожали дека бил „грубо наместен“ од новинарите.
Весникот, иако признава дека „алчниот за пари“ селектор е жртва на „местенка“, нагласува дека постапката на новинарите-истражувачи е исправна и дека така треба да работат сите весници за да се изградат во истражувачки и вистински слободни медиуми.
Осрамотениот и понижен фудбалски експерт за „Дејли Стар“ изјави дека една година ќе отсуствува од фудбалот и за тоа време ќе напише книга, за која тврди дека ќе предизвика „експлозија“ со сознанијата што ќе и ги открие на јавноста.
Лондонската полиција денеска соопшти дека одново ќе ги разгледа сите наоди на „Дејли Телеграф“. околу корупцијата во англискиот фудбал, вклучувајќи ги и сознанијата за осумтемина тренери и менаџери кои беа посочени како корумпирани од весникот и неговите новинари.