Англискиот фудбал може да го загуби својот сјај поради алчноста на некои луѓе. Корупцискиот скандал на Островот добива сè поголеми димензии.
Откако новинари открија дека Сем Алардајс побарал 400.000 поткуп, за да помогне во работи кои се забранети од англиската федерација, сега се повеќе фудбалски имиња се наоѓаат на листата. Поради скандалот, Алардајс по само 67 дена на селекторското место доби отказ.
МНОГУ ДОКАЖАНИ ИМИЊА СЕГА СЕ „ЗАЦРНЕТИ“
Новинарите најавија дека листата на корумпирани тренери е многу поголема и од ден на ден само го зголемуваат списокот. Втор на листата беше Џими Флојд Хаселбенк, а сега се додадоа и Рајан Гигс, Дејвид Мојс и Хари Реднап. Сите овие тројца се докажани и почитувани фудбалски имиња, но сега се дел од листата на срамот.
Играчката легенда на Манчестер Јунајтед Гигс беше помошник тренер на „црвените ѓаволи“, додека Мојс беше на чело на тимот од „Олд Трафорд“. Реднап во кариерата ги водеше екипите Борнемут, Вест Хем, Портсмут, Саутемптон, Тотенхем и Квинс Парк Ренџерс.
Од Фудбалската федерација на Англија најавија детална истрага за целиот случај кој мора да биде расчистен и да се врати стариот сјај на фудбалот во Англија. Челниците на федерацијата бараат материјални докази за да се потврди вината кај сите кои се спомнати во скандалот.
АЛАРДАЈС СО ПОРАКА ДО РЕПРЕЗЕНТАТИВЦИТЕ
Разрешениот селектор Алардајс им испрати порака до репрезентативците на Англија кои само овој месец ја почнаа битката за пласман на Светското првенство во Русија. Алардајс само еден меч беше предводник на „Гордиот Албион“ и победи. Сепак, поради нефудбалски скандал мораше да си замине. Сега репрезентацијата со привремен селектор ќе ги игра двата меча во октомврискиот циклус, против Словенија и Малта.