Икер Касилјас си замина од Реал Мадрид, но продолжува со рекорди во Лигата на шампионите. Сега како чувар на мрежата на Порто, Касилјас постави нов рекорд во историјата на елитното натпреварување. Со победата на гости кај Бриж, голманот стигна до 92 победи и на тој начин изби на првото место на листата во оваа категорија.
Касилјас го надмина легендата на Барселона, Чави Ернандес, кој кариерата ја заврши со 91 победи во ЛШ. Голманот на Порто веќе 17 сезони е дел од ЛШ. Во кариерата, трипати се радувал на големиот сребрен трофеј, и тоа како играч на „Кралскиот клуб“.
Сега Касилјас зад себе го остави Чави, а потоа следи Кристијано Роналдо. Првата ѕвезда на Реал досега има 81 победа во ЛШ. Во топ 10 играчи со најмногу победи се Раул со 79 победи, Рајан Гигс со 74 победи, Андрес Иниеста (71), Карлес Пужол (67), Филип Лам (66), Кларенс Сидорф (65), Виктор Валдес (64) и Роберто Карлос со 64 победи. Интересно но на оваа листа го нема Лионел Меси.