На Бобан Николов му беа потребни 11. минути за да ја потврди победата на Вардар на гостувањето кај Шкендија. Влезе во 64. минута, а во 75. минута го постигна гол за големи три бода.
„Во првите 20 минути од натпреварот игравме внимателно и трпеливо чекавме шанса за гол. Таа прилика стигна преку слободен удар од кој успеавме да дојдеме до водство. Потоа нашата одбрана ја заврши работата во првото полувреме. На стартот од вториот дел Шкендија нападна да даде гол, а ние чекавме некоја контра ние да постигнеме уште еден. Влегов јас, и на мое општо задоволство успеав токму јас да го постигнам тој втор гол за мојата екипа. Се најдов во добра позиција, шутнав и успеав да погодам.
Среќен сум поради мојот гол, но уште посреќен поради победата на Вардар. Морам да ги пофалам сите играчи. Одигравме онака како што се договоривме пред мечот, и тоа ја донесе победата. Ова беа големи три бода за Вардар после кои ќе треба да останеме на земја и да се фокусираме кон следните натпревари на кои што секогаш ќе одиме на победа како што беше тоа случај и на дуелот со Шкендија“, изјави Боби Николов, стрелецот на вториот гол.