Селекторот на македонската фудбалска репрезентација, Игор Ангеловски денеска ја изврши првата прозивка за претстојниот квалификациски натпревар со Шпанија на гостински терен. Со исклучок на голманот Столе Димитриевски кој ќе се приклучи подоцна, останатите повикани фудбалери се појавија на прозивката.
- Ме радува формата на репрезентативците и присуството на младите играчи кои остварија историски успех со пласман на Европското првенство. Имаме квалитет и верувам дека ќе ја продолжиме низата од добри игри. Секогаш велам дека за мене Шпанија е меѓу најдобрите светски селекции и затоа ќе биде тешко. Ние сакаме и против таква велесила да потврдиме дека сме кадарни да играме добро во континуитет, изјави македонскиот селектор.
Натпреварот ќе се игра во Гранада на 12 ноември.
За Македонија ова ќе биде трето гостување во Шпанија во квалификации за големо натпреварување. На претходните две претрпе порази од 3:0 (1996) и 5:1 (2014).