Актуелниот италијански првак Јувентус загуби на гостувањето кај Џенова со 3:1, а покрај поразот ги снајде уште една несреќа. Дефанзивецот на „Старата дама“, Дани Алвеш, заработи тешка повреда и на носилки беше изнесен од теренот на стадионот „Луиџи Ферарис“.
Според лекарските прегледи, Бразилецот има скршеница на десната нога и ќе мора да паузира помеѓу три и четири месеци.
„Благодарам на сите за поддршката. За жал, во нашата професија постои ризик и повредите се составен дел. Пријателите, семејството и многу навивачи ми посакаа што е можно поскоро да се вратам на теренот“, напиша Алвеш на социјалните мрежи.
Алвеш беше стандарден на десната бековска позиција, а дури постигна и еден погодок. На неговото место сега ќе биде Стефан Лихштајнер.