Холандскиот фудбалски тренер Луј ван Гал соопшти дека донел одлука да ја заврши кариерата.
- И минатата година реков дека ставам крај на мојата кариера, но подоцна ја сменив таа одлука и решив прво да се одморам. Јас всушност сакав да се откажам после Светското првенство пред три години. Сега верувам дека веќе нема да се вратам на тренерското место, изјави Ван Гал за холандски „Телеграф“.
Тој додаде дека последните случување во неговото семејство го убедиле да донесе таква одлука. Како што информира „Телеграф“, една од ќерките на Ван Гал минатиот месец го загубила својот сопруг кој ненадејно починал, и сега тој сака да биде заедно со своето семејство, и да помогне во овие тешки мигови за нив.
- Можев да одам и да заработам многу пари, но јас одлучив дека моето семејство ми е најважно. Минуваме низ еден тежок период, во минатото исто така семејството многу се жртвуваше за мојата професија и сега е моментот јас целосно да се посветам на нив, изјави Холанѓанецот.
Ван Гал ја почна тренерската кариера во 1991 година, беше тренер на Ајакс, Барселона, Баерн Минхен и на Манчестер Јунајтед, како и селектор на Холандија. Има освоено 20 клупски трофеи.