Сагата меѓу Челзи и Диего Коста продолжува, а по бунтот на Шпанецот и неговото изоставување од составот за мечот со Лестер менаџерот Антонио Конте најави разговор за помирување со својот најдобар напаѓач.
Италијанецот појасни дека причината што Коста не играше во саботата е повреда, меѓутоа вистината е дека Коста добил извонредна понуда од Кина, меѓутоа клубот одбил да го пушти. Поради тоа Шпанецот одбил да тренира, а Челзи го исфрли од тимот.
Според англиските медиуми, Тјанџин предложил 80 милиони евра, а на фудбалерот годишна плата од 35 милиони евра. Напаѓачот бил подготвен да замине во Кина, но раководството на клубот кажало „стоп“.
Во меѓувреме сопственикот на клубот, Роман Абрамович, дал наредба итно да се помират тренерот и фудбалерот и да нема расипување на атмосферата во периодот кога клубот игра извонредно и ита кон титулата. Коста е под договор со Челзи до 2020 година.
Конте кажа дека денеска ќе разговара со незадоволниот играч и да ги разрешат проблемите. Најверојатно Шпанецот ќе остане во клубот до крајот на сезоната, а потоа ќе му биде дозволено да премине во Кина.