Германскиот првак Баерн Минхен нема шанси да го продаде Томас Милер. Баварскиот гигант ова го потврди и по последната понуда која пристигна на „Алијанц арена“. Манчестер Јунајтед е тимот кој залудно се обидува да го „украде“ германскиот репрезентативец.
Најтрофејниот англиски тим веќе со месеци се обидува на „Олд Трафорд“ да го доведе Милер. Најновата офанзива беше поткрепена со понуда вредна 100 милиони евра. Сепак, и тоа е недоволно, потврдија од таборот на Баерн.
„По факс добивме понуда од Англија. Тоа повторно беше од Манчестер Јунајтед. Тие повторно бараат да го купат Томас Милер, но во нашиот тим никогаш на дневен ред не било ова прашање. Милер нема да си замине од Баерн“, вели извршниот потпретседател тимот од Минхен, Јан-Кристијан Дрезен.
Играчот кој со години е еден од најдобрите во Баерн, сезонава е во слаба форма. Досега даде само четири погодоци, но и тоа не е проблем за германскиот тим, кој има разбирање и чека нов блесок на офанзивецот.
Менаџерот на Манчестер Јунајтед, Жозе Мурињо, пред почетокот на сезонава потроши повеќе од 160 милиони евра за доведување на Пол Погба, Хенрик Мхитарјан и Ерик Бај. Златан Ибрахимовиќ дојде на „Олд Трафорд“ за беспари.