РБ Лајпциг најверојатно ќе заврши меѓу четирите најдобри екипи во Германија и ќе избори учество во Лигата на шампионите, меѓутоа, нивниот настап во елитата може да биде попречен поради правилата кои ги налага УЕФА, соопштуваат австриските медиуми. Имено Европската фудбалска куќа вели дека два клуба кои се во сопственост на ист спонзор, организација или човек не смеат да настапуваат во Лигата на шампионите.
На Лајпциг „проблем“ му прави РБ Салцбург кој моментално се наоѓа на првото место во Австрија. И двата клуба се во сопственост на компанијата за енергетски пијалоци Ред Бул и газдата Дитер Матешиц. Според правилата еден од овие два клуба ќе може во Лигата на шампионите, а другиот ќе мора да ја прескокне сезоната во Европа.
Меѓутоа Лајпциг за германски „Кикер“ коментира дека тоа нема да претставува проблем и за двата клуба ќе има место во ЛШ. Во документите Ред Бул се води како сопственик и главен спонзор само на клубот од Салцбург. Како сопственик на германскиот клуб е запишан Расенбалшпорт Лајпциг. Германскиот тим уште кога влезе во Втората лига мораше да го менува името па токму префиксот РБ значи Расенбалшпорт за да не се поклопува со името Ред Бул поради правилата на Бундес лигата.
„Ние во Лајпциг не сме вознемирени бидејќи од УЕФА не сме добиле никакви информации. Нема причина да не настапуваме во ЛШ, само треба да се избориме“, изјави извршниот директор Оливер Минтцлаф.