Победата на Челзи со 3:1 над Свонси означи и израмнување на клупски рекорд од 12 едноподруго домашни победи во сите конкуренции. А тимот првпат сезонава прима голови на два меча по ред во Премиер лигата.
Последен пат кога Челзи загуби бодови на „Стемфорд Бриџ“ беше во поразот од Ливерпул во септември. Откако Конте го смени системот на игра во 3-4-3 тимот направи импресивна серија на победи по кои се најде во одлична позиција за титулата.
И покрај тоа што има голема предност во однос на Сити, Конте вели дека уште е рано да се слави.
„Разликата не е 11 поени. Тоа е предноста во однос на Манчестер сити, кој не играше овој викенд, но останатите тимови имаат натпревари. Јас имам своја математика - потребни ни се 29 бодови за титулата. Имаме 12 меча до крајот и јас продолжувам да им повторувам на играчите дека треба да продолжат здраво да работат и да играат со истиот жар како и досега“, изјави Конте.
На натпреварот со Свонси јубилеј прослави Сеск Фабрегас на кого му беше 300. во Премиер лигата. Тој е првиот Шпанец со толкав број на мечеви во Англија.