Откако Рома доби дозвола од градската управа на Рим за изградба на сопствен стадион, сега и другиот клуб од градот Лацио сака свој стадион. „Орлите“ немаат намера да заостануваат во однос на големиот соперник па затоа ги почнале плановите за изградба на нова арена за своите потреби. Како што е познато Лацио и Рома моментално го делат Олимпико, а двата клуба почнаа да играа мечеви на него од 1953 година.
Лацијаните напишаа писмо до градоначалничката Вирџинија Раџи во која ја известија за идејата за сопствен стадион.
„Забележавме дека Вашата администрација успеала да ги надмине пречките и да постигне согласност со Рома за изградба на нов стадион за потребите на клубот. Се надеваме дека ќе постапите на ист начин и ќе ни дозволите и на нас да изградиме сопствен стадион“, напишаа од Лацио.