Скопје, 1 март 2017 (МИА) - Во фудбалскиот Куп на Македонија, денеска ќе се играат првите полуфинални натпревари. Оваа рунда го носи дуелот на Вардар и Шкеднија, екипите кои претендираат за двата трофеја во мак-фудбалот, шампионскиот и купот.
Актуелниот шампион и лидер на табелата во Првата лига, Вардар ја пречекува тетовска Шкендија која е бранител на трофејот од купот освен минатата сезона.
Пред три дена овие две екипи го одиграа и првенствениот дерби натпревар во кој вардарци забележаа победа со 3:1.
Натпреварот ќе се игра на националната арена „Филип Втори“ во Скопје со почеток во 14 часот.
Во вториот полуфинален меч ќе се сретнат Брегалница и Пелистер. И овие два тима пред четири дена играа меѓусебно во прволигашката конкуренција, а средбата заврши со победа на битолчани со 2:1. Средбата ќе се игра на Градскиот стадион во Штип со почеток од 17 часот.
Реванш полуфиналните средби на програмата се на 19 април, додека финалето е закажано за 17 мај.