Ѕвездата на Арсенал, Алексис Санчез, може да го пропушти остатокот од сезоната поради тешка повреда на глуждот. Врз него стартуваше домашниот играч Џејмс Меклин, а Санчез и покрај желбата за игра мораше да го напушти теренот. Неговиот Арсенал загуби од ВБА со 3:1 кој се оддалечи од првите четири места кои водат во Лигата на шампионите идната сезона. Тоа уште повеќе го навлече гневот на навивачите кои бараат заминување од Венгер.
„Десниот глужд на Алексис е во ужасна состојба. Не требаше да игра во второто полувреме, меѓутоа сакаше да помогне и само ја вложи повредата. Моравме да го смениме. Не е исклучено дека има скинати лигаменти“, изјави тренерот Арсен Венгер.
Алексис сигурно ќе ги пропушти квалификациите на Чиле со Аргентина на 24 март и Венецуела на 29 март, а ако лекарите потврдат дека се работи за оштетени лигаменти тогаш тој нема да игра до крајот на сезоната.
На мечот со ВБА се повреди и Петр Чех и излезе во првото полувреме и на негово место влезе Оспина. Допрва ќе се знае сериозноста на неговата повреда. А ден пред мечот се повреди и Месут Озил и тој го пропушти дуелот на Хоторнс.