Менаџерот на Манчестер јунајтед, Жозе Мурињо, изјави дека претпочита тимот да ја освои Лигата на Европа отколку да заврши во топ 4 на табелата во Премиер лигата. „Црвените ѓаволи“ бараат место во Лигата на шампионите, а од четвртото место се оддалечени четири бода. Исто така тимот е во четвртфиналето на Лига Европа каде ќе се соочи со Андерлехт.
„Ако одбирам меѓу двете тогаш би избрал триумф во Лигата на Европа отколку пласман во топ 4 во Премиер лигата. И двете даваат билет за Лигата на шампионите, меѓутоа разликата е во трофеј, а трофејот дава престиж, а освен тоа ни дава можност да играме во Суперкупот на Европа“, изјави Португалецот кој додаде дека Челзи, Тотенхем, Ливерпул, Арсенал и Сити имаат предност во борбата за врвот затоа што не играат во Европа и имаат по еден меч седмично.
Претходната недела Јунајтед одигра три натпревари на што се пожали и Мурињо. Во понеделникот играше со Челзи во ФА Купот, па реваншот од осминафиналето на ЛЕ против Ростов па во неделата првенствен меч со Мидлсбро.