Манчестер јунајтед и Чикаго фајрс се договорија за трансферот на Бастијан Швајнштајгер во САД. Официјална верификација ќе се случи во понеделник и Германецот ќе треба само да ги помине лекарските прегледи за да може да добие работна виза и да го облече дресот на тимот на Чикаго.
Договорот ќе биде потпишан на една година, а популарниот Швајни ќе добива 70.000 фунти неделна плата. Со таков договор, тој ќе биде меѓу десетте најскапоплатени играчи во МЛС.
„Во текот на целата кариера секогаш сум гледал можност да играм таму каде што би можел да постигнам нешто големо. Ништо не е различно и со Чикаго. Тажен сум што си заминувам од Манчестер каде стекнав голем број пријатели. Благодарен сум му на клубот што ми даде можност да заминам во Чикаго“, рече Швајнштајгер.
Некогашниот капитен на германската репрезентација дојде на „Олд Трафорд“ во 2015 година, кога за него беа платени 14,5 милиони фунти, но не се снајде најдобро во дресот на најтрофејниот англиски клуб.