Одлуката на ФИФА да го суспендира Лео Меси на четири меча за Аргентина наиде на остри реакции во тамошната јавност па се оди дури и до теории на заговор. „Гаучосите“ се најдоа во тешка ситуација во борбата за место на СП, а може да се случи на крајот да извисат. Меси не го играше мечот против Боливија што Аргентина го изгуби, а ќе ги пропушти и наредните три, како и гостувањето кај Уругвај.
Во барањето на „виновникот“ новинарите отидоа дури до Диего Марадона кого го обвинуваат дека токму тој инсистирал неговиот наследник да добие висока казна. Марадона работи како советник во Светската фудбалска куќа (ФИФА).
„Разговарав со човек вработен во ФИФА и тој ми потврди дека Марадона ургирал за максимална казна за Меси“, напишал на Твитер новинарот Гонса Ступененго.
Аргентинскиот „Оле“ вели дека уддел во тоа има шефот на судиската комисија на Конмебол, Бразилецот Вилсон Сенеме. Се претпоставува дека тој ја покренал целата бура. На снимката по мечот со Чиле минатата недела се гледа дека Меси разменува зборови со бразилскиот судија Сандро Ричи и неговите асистенти, а тие не го ставиле овој инцидент во записникот. Сенеме побарал видеоснимка од ситуацијата, а од делегатот Хорхе Ларионда проширување на записникот со овој инцидент. Снимките заедно со записникот се испратени до ФИФА која подоцна донела одлука за суспензија.