Менаџерот на Челзи, Антонио Конте даде свое видување зошто англиските екипи не може да направат успех во Лигата на шампионите, но и зошто репрезентацијата на Англија речиси секогаш е разочарување на големите натпреварувања.
Според италијанскиот стратег, главна причина за слабите настапи на Англичаните на меѓународна сцена е тоа што играчите се истоштени. Според Конте, Премиерлигата одзема многу енергија на фудбалерите во текот на сезоната и потоа тие се истоштени и не може да го дадат најдоброто од себе.
„Англиската Премиерлига е многу тешко натпреварување. Многу е поразлично од шпанското или италијанското првенство. Верувам дека поради тој факт, англиските екипи тешко прават успеси во Европа, но и националната селекција не може да постигне успех на големо натпреварување“, вели Конте.
На Челзи му недостасуваат само уште шест бода за и дефинитивно да ја освои титулата во Премиерлигата. Лидерот во првенството, денеска на свој терен игра против Мидлсбро. Тотенхем е единствениот тим кој може да го загрози тронот на „сините“ од Лондон.