Двократниот освојувач на Купот на УЕФА и некогашен славен калчолигаш успеа да избори позиција во Серија Б и пополека го исполнува сонот за кам-бек во најсилната италијанска лига.
А тоа може да стане реалност за брзо време, бидејќи ќе добие свеж капитал за развој и растење. Имено, кинеската компанија „Деспорт груп“, предводена од бизнисменот Жанг Лиженг, успеа да го купи мнозинскиот пакет акции во клубот. Интересот е од поодамна, но сега клубот се пофали дека зделката е завршена.
Менаџментот на Парма, сочинет од групата „Нов почеток“ која го возобнови клубот по прогласувањето банкрот и по заминувањето во стечај, ќе продаде 60% од акциите на кинеската компанија. Засега ќе задржи 30 отсто од нив, додека останатите 10 отсто од вкупниот број акции им припаѓаат на навивачите.
„Имавме многу средби со кинескиот бизнисмен Жанг Лиженг, кој е претседател на компанијата ’Деспорт’, заинтересирана да го купи клубот. Тој работи на продажба на телевизиски права од областа на спортот и веќе има врски со фудбалот и со НБА. Ние имавме потреба од стабилност и од свеж капитал, но и од управувач на мнозинскиот пакет акции. Клубот е веќе на високо ниво и потребни се инвестиции за да продолжи да расте и да се развива“, изјавија од клубот од „Енио Тардини“.