Милан го раскина договорот со младиот офанзивен играч за врска, 19-годишниот Хаким Мастур, откако тој не успеа да ги задоволи апетитите на стручниот штаб. Но неговото заминување е само уште еден доказ дека во големите клубови нема или има многу малку место за млади играчи, особено за фудбалери од нивната школа.
Можеби, името Мастур не ви е познато, но пред три години, во Милан, го прогласија за најголем талент на клубот во 21 век. Со своите непредливи дриблинзи, брзина и вештина со топката, беше споредуван со Нејмар и со Роналдињо.
Тој беше промовиран во првиот тим од тогашниот тренер Кларенс Сидорф, а беше на клупата на последниот меч во сезоната 2013-2014. Кога се очекуваше следната сезона да дебитира во првиот тим и да почне да запишува минутажа, од клубот го испратија на едногодишно позајмување во Малага. Минатата сезона, пак, ја помина во холандскиот ПЕЦ Цволе (собра вкупно седум настапи). А сега доби отказ од Милан.
Така, најголемиот талент на Милан во 21 век е принуден да си побара друг клуб.