Кеита Балде Дијао може да се смета за нов фудбалер на Интер, барем така тврди агентот на крилниот напаѓач. Трансферот од Лацио вреден 22 милиони евра може да биде завршен во наредните денови. Сенегалскиот репрезентативец одби да го поднови договорот со „орлите“ и идното лето ќе стане слободен агент. За да не го испушти без пари, Лацио реши да го продаде уште сега.
Па така, римскиот клуб прифатил 22 милиони евра, а фудбалерот ќе потпише петгодишен договор, со плата од три милиони евра од сезона. Со овој брзоног фудбалер, Интер ќе ја пополни испразнетата позиција што ќе се појави по заминувањето на Иван Перишиќ.
Балде Дијао потекнува од академијата на Барселона и оттаму премина во Лацио. За првиот тим дебитираше во 2013 година и досега одигра 110 натпревари во Серија А, на кои реализираше 26 гола.
Роден е во Шпанија, но родителите му се од Сенегал, па одигра 12 натпревари за репрезентацијата на оваа африканска држава.