По само една недела откако потпиша договор со повратникот во Серија А, Верона, италијанскиот ветеран Антонио Касано одлучи да го напушти фудбалот. „Газета дело спорт“, од извори блиски до фудбалерот, информира дека тој ѝ кажал „збогум“ на Верона и дека со тоа, истовремено, се простува од професионалното играње фудбал поради фамилијарни причини или поточно поради носталгија.
Триесет и петгодишниот фудбалер остави длабок белег во италијанскиот фудбал, затоа што настапуваше за многу клубови во Серија А. Почна во Бари, па продолжи во Рома, Сампдорија, Милан, Интер, Парма, а кратко беше и член на Реал Мадрид. За Италија одигра 39 натпревари и постигна 10 погодоци.
Тој е еден од најконтроверзните италијански играчи. Познат е по својата недисциплина и низата инциденти, меѓу кои и славната караница со поранешниот претседател на Сампдорија, Рикардо Гароне, и физичката пресметка во соблекувалната со екстренерот на Интер, Андреа Страмачони.