Навивачите на Фиорентина уште не можат да го заборават преминот на Роби Баџо во Јувентус, а клубот е на чекор да им приреди уште еден шок. Токму тој трансфер го разбуди гневот на тосканците кон Јувентус, а сега ќе се соочат со уште еден удар, затоа што италијанскиот шампион ќе им го „украде“ миленикот Федерико Бернардески.
Интересот на Јувентус за Бернардески се засили по завршување на сезоната, па се тргна од 30 милиони евра, па 40 милиони евра, плус два во бонуси и некој од играчите на Јуве, Стураро или Ринкон, за на крајот да не бидат вклучени никакви играчи, туку 40 милиони евра, плус пет во бонуси.
Целата работа ја потегнал агентот на играчот, Бепе Боцо, кој по низа разговори со луѓето од Фиорентина, конечно, нашол решение за реализација на трансферот. Јувентус на крајот попуштил и се согласил на сума од 45 милиони евра за бисерот на Фиорентина. Додуша голем улога во целата ситуација одиграл и самиот фудбалер, кој не сакаше да го продолжи договорот и јасно порача дека сака во Јувентус, иако од девет години е во Фиорентина.
Јуве знаел да направи добри проценки, тренерот Макс Алегри инсистирал да му биде доведен италијанскиот репрезентативец, затоа што може да игра на повеќе позиции во тимот, како десно крило, како плејмејкер, зад напаѓачот, што значи дека може да го употребува на различни позиции. Бернардески во Јуве го чека „десетката“, која своевремено ја носел Дел Пјеро, па Тевез, а ќе добие договор од четири милиони евра од сезона.
Го очекуваме наредните денови да притигне во Торино и да го комплетира долгонајавуваниот трансфер.