УЕФА го назначи Џанлука Роки за главен судија на мечот од Суперкупот на Европа помеѓу Реал Мадрид и Манчестер јунајтед, кој ќе се игра на стадионот „Филип Втори“ во Скопје, на 8 август. Четириесет и тригодишниот Италијанец за помошници ќе има петмина сонародници. Асистенти ќе му бидат Еленито ди Либераторе и Мауро Тонолини. За дополнителни судии се назначени Даведи Маса и Масимилијано Ирати. Резервен судија ќе биде Рикардо ди Фиоре, а четврти - Французинот Клемен Турпен.
Роки е меѓународен судија од 2008 година, а досега има водено 72 меча под капата на УЕФА. Минатата сезона судеше на девет натпревари во европските купови, вклучително и четвртфиналниот реванш од ЛШ меѓу Лестер и Атлетико и вториот меч од осминафиналето меѓу Монако и Манчестер сити.