Бразилецот вели ова му е погодокот на досегашната кариера. Среќен за постигнатото, ветува и повеќе.
За успехот се „виновни“ сите од Вардар. И стручниот штаб, и играчите, и раководството и сите оние што се поврзани со таборот на „црвено-црните“. Меѓутоа победата над Копенхаген ја донесе голот на Балотели. Бразилецот, на некој начин, се извади за онаа неискористена шанса на стартот од вториот дел, со тоа што успеа да стрела во мрежата на противникот.
„Ова беше мојот најдраг гол во кариерата. Да се победи ваков голем тим не е мала работа, а уште со мојот гол“, изјави Балотели.
„Штета што не успеав порано да реализирам, иако имав шанса. Сепак, нивниот стопер ме стигна и успеа да ме блокира. Ова е важна победа. Сакавме триумф, и го остваривме. Се надевам дека ќе биде доволен да поминеме понатаму“, рече Балотели.
Што го чека Вардар на реваншот?
„Треба да играме исто, да дадеме гол и таму. Јас мислам дека ќе имаме шанси, и ќе треба да ги реализираме. Атмосферата во екипата е одлична и се надевам дека ќе продолжиме во ист стил. Исто така, благодарност и до прекрасната публика“, вели Бразилецот во нападот на Вардар.