Најдобриот стрелец на Челзи од минатата сезона, Диего Коста, сега е на маргините од екипата. Голгетерот кој беше еден од најзаслужните што Челзи стана првак на Англија, се жали дека во клубот го третираат како криминалец и дека уште не е најдено решение за неговата ситуација. Тој најави дека летово сака да си оди, но засега нема позитивен одговор од управата на тимот од „Стемфорд бриџ“.
„Чекам да ме пуштат. Не сакав да си одам, бев среќен, но кога тренерот повеќе не ве сака, тогаш морате да си заминете. Во јануари се случи таа работа со тренерот. Бев на чекор до потпишување нов договор, но сѐ е стопирано. Претпоставувам дека зад сето тоа стои тренерот. Го почитувам како еден одличен тренер кој направи многу работи за Челзи, но не и како личност. Тој не е близок со играчите. Многу е далечен и нема харизма", објаснува Коста за односот со Конте.
Напаѓачот имаше понуда да замине во Кина или да се врати во Шпанија, во екипата на Атлетико Мадрид, но засега нема ништо од такво нешто.
„Сакаат да тренирам со резервниот тим. Не би ми биле дозволени пристап во соблекувалната и контакт со соиграчите од првиот тим. Па јас не сум криминалец! Не е фер да ме третираат така по сѐ што сторив за клубот. Сакам овој месец да се постигне договор со Атлетико. Одбив многу други понуди. Сакаа да ме продадат во Кина. Но сакам да одам во клуб каде што сакам јас, а не во некој што дава најмногу пари. Подготвен сум да се вратам и во Бразил на една година и да не играм, без оглед на тоа што Челзи, веројатно, би ме казнил или ми ја намалил платата", вели Коста.