Тројца од шестмината приведени Хрвати, кои учествуваа во масовната хулиганска пресметка за време на дербито во Белград, биле платени за учество во тепачката. Кај еден од нив е најдена и одредена количина дрога, за која казната е неколку години затвор, пишува „Блиц“.
Според весникот, Хрватите, кои биле од Сплит, добиле 10.000 евра да дојдат во Белград и да направат немири на фудбалското дерби Паритзан - Црвена Звезда.
Полициски извори на Блиц не наведуваат кој е нарачателот, за да не се влијае на истрагата.
- Парите потекнуваат од „жестоко момче“ од белградското подземје. Тој не доаѓа на натпревари и не е меѓу хулиганите, изјави анонимен извор за весникот.
Во тепачката учествувале најмалку шестмина Хрвати, меѓу кои и боксерот Дамир Товаровиќ, некогашниот државен првак на Хрватска во боречки спортови.
Во големото 156-то дерби меѓу Партизан и Црвена звезда, кое во средата заврши без победник 1-1, беа повредени повеќе „гробари“.
До инцидентот дојде во моментот кога 50-тина навивачи на Црвена звезда почнале да ги кинат транспарентите на „гробарите“, при што навивачите на Партизан веднаш физички се пресметале со „делиите“.
Како што информираа српските медиуми, дел од повредените биле претепани и соблечени до гола кожа, а некои имале и изгореници од запалените факели.
Тепачката, која траеше 10-тина минути, беше спречена од страна на полицијата, која од стадионот отстрани навивачи.