Без непотребни ризици. Така може да се определи потегот на Шкотската фудбалска асоцијација за назначување на нов селектор. Тие ангажираа познато име, Алекс Меклиш, за да ја предводи репрезентацијата.
59-годишниот специјалист ќе биде официјално претставен утре, кога ќе го потпише неговиот договор, кој ќе биде во сила до 2020 година. Тој го замени Гордон Страхан, чиј договор не беше обновен по квалификациите за СП.
Меклиш го предводеше шкотскиот национален тим во 2007 година пред да го преземе тогашниот учесник во Премиер Лигата - Бирмингем. Тој во повеќе наврати изјавувал дека сака повторно да ги преземе „сино-белите“.
Специјалистот е невработен повеќе година и половина. За последно работеше во Египет, каде што беше на чело на Замалек до 2016 година. Надежите се да ја рангира Шкотска на големо натпреварување, за прв пат по 1998 година.