Мадрид, 17 септември 2018 (МИА) - Еден од најдобрите фудбалери на светот Антоан Гризман упати критики на сметка на ФИФА, бидејќи не се најде во потесниот круг во изборот за играч на годината и наведе дека се надева на наградата „Златна топка“.
Во конкуренција за наградата „Бест“ на ФИФА се најдоа Кристијано Роналдо, Лука Модриќ и Мохамед Салах.
- Франција е првак на светот. Ние завршивме одлична работа на Мундијалот, кој е натпреварување на ФИФА. Мислам дека некој од нас требаше да влезе во изборот - Канте, Мбапе, Варан или јас, истакна францускот фудбалер.
Тој смета дека сега игра на ниво на Кристијано Роналдо и Лионел Меси и дека очекува на крајот од годината да ја добие наградата „Златна топка“, која ја доделува „Франс фудбал“.
- Имам уште три месеци напорно да работам за да ја освојам „Златната топка“, за која сметам дека е поважна од наградата на ФИФА, наведе францускот фудбалер.
Гризман во 2018 година со француската репрезентација го освои Светското првенство во Русија, а со Атлетико Мадрид ја освои Лигата на Европа и европскиот Суперкуп.