IDIVIDI

среда, 14.05.2008

IDIVIDI Мени

Спорт / Фудбал

НАЈТРОФЕЈНИОТ МАКЕДОНСКИ КЛУБ "ИЗБРИШАН" И ОД ФУДБАЛСКАТА ФЕДЕРАЦИЈА НА МАКЕДОНИЈА
Вардар не доби лиценца за Европа

Најтрофејниот македонски клуб нема да има право на настап во годинашниве натпревари од Интер-тото купот, барем според првичната одлука на Лиценцната комисија при ФФМ за неиздавање европска дозвола за "црвено-црните".

На својот состанок во понеделникот Лиценцната комисија, во состав Пеливанов, Јаневски, Лазаров, Бејта, Миралајски и Петрунов, како што се истакнува на интернет страницата на ФФМ, согласно членовите 11, 31 и 51 од Правилникот за лиценцирање донесе одлука да не издаде лиценца на ФК Вардар.

Сепак, од таборот на "вардарците" истакнуваат дека уште денеска ќе ја обжалат првичната одлука, бидејќи се работи само за мало недоразбирање околу финансискиот извештај за 2006/2007 година, па во текот на денешниот ден се очекува ФК Вардар да ја добие неопходната дозвола за европски настап.

"Проблемот е настанат поради финансискиот извештај за 2006/2007 година. Меѓутоа веќе се договорени сите детали со компанијата која ги изработува извештаите. Беше неопходно да се платат 20.000 евра. Проблемот е надминат, и веќе во текот на утрешниот ден (н.з денеска) очекуваме да ја добиеме лиценцата", ни изјавија вчера од раководството на "црвено-црните".

Како што е познато, тимот од "Градски" и минатата година на првиот состанок на Лиценцната комисија не доби дозвола за европски настап, меѓутоа подоцна по поднесувањето жалба и докомплетирањето на документацијата доби лиценца за настап на натпреварите од Купот на УЕФА.

Инаку, на седницата на Лиценцната комисија при ФФМ, пак, издадени се лиценци за натпреварувањата во организација на УЕФА на Работнички К и на Милано.

Како четвртопласиран тим во домашниот шампионат, пред крајот на последните две кола "вардарците" имаат обезбедено место во Интер-тото купот, меѓутоа доколку не ја добијат неопходната лиценца нивното место ќе го заземе екипата на Ренова. Ренова заедно со Пелистер добија лиценци за настап во Европа на претходниот состанок на Лиценцната комисија, а беа одбиени барањата на Победа и Македонија ЃП.