IDIVIDI

четврток, 10.07.2008

IDIVIDI Мени

Спорт / Фудбал

ОТКАКО ФФФ МУ ДАДЕ ПОДДРШКА НА ДОМЕНЕШ
Трезеге се откажа од репрезентацијата

Одлуката на Француската фудбалска федерација (ФФФ) да ја продолжи соработката со селекторот Рејмон Доменеш го принуди Давид Трезеге да го објави својот крај НА репрезентативната кариера иако во последниве две години беше далеку од националниот тим. Познато е дека Доменеш и Трезеге беа во исклучително лоши односи во последните години и тоа резултираше со исклучително мала минутажа на напаѓачот на Мундијалот во Германија пред две години и неповикување за европското првенство што неодамна се одржа во Австрија и Швајцарија иако Трезеге беше втор стрелец во Серија “А” претходната сезона со 20 постигнати гола. Факт е дека и самиот голгетер е свесен дека нема шанси да се избори за место во репрезентацијата, па подобро е на ваков начин да се откаже од неа.

“Доменеш останува, а јас повеќе не размислувам за репрезентацијата. Не знам како е можно ова, Франција играше катастрофално на европското првенство, а селекторот доби доверба да го води националниот тим уште две години. Јас го гледам фудбалот сосема поинаку од Доменеш и мислам дека нема можност да соработуваме во иднина”, рече Трезеге, кој со репрезентацијата на Франција освои една светска и една европска титула на крајот од минатата деценија, а сè уште се памети неговиот гол за одлука во финале на евро-шампионатот во Белгија и Холандија во 2000 година.

Во иднина, како што рече, Трезеге ќе се фокусира на настапите во Јувентус со кого оваа сезона се враќа во Лигата на шампионите, но и во борбата за титулата во Серија “А” по двегодишна пауза.

“Потребно е нешто да освоиме оваа година бидејќи Јувентус има одлични фудбалери. Добро е што сите во клубот имаат верба дека такво нешто може да се случи”, додаде легендарниот француски напаѓач.

За репрезентацијата на Франција Трезеге одигра 71 натпревар и постигна 34 гола со што е на третото место на вечната листа на стрелци зад Тиери Анри и Мишел Платини.